Thursday, September 6, 2012

انا مع مين؟ انا حراك انا موالاة ولا مين ؟؟

سرقوا عمان
انا مع مين؟ انا حراك انا موالاة ولا مين ؟؟

اذا عمرك طلعت مظاهرة او اعتصام وانت مش عارف لشو هذا الاعتصام اكيد انت في الاردن.


انا من لما طلع موضوع الموالاة و المعارضة و انا ضد هذا التصنيف, بلدنا عمرو ما كان في اي نوع من التصنيف! طول عمري بعرف تصنيف واحد في الاردن – اردني او فلسطيني(بلجيكي) مع احترامي للجميع  لانو الاردن هلا صار فيّ بالاضافة لما سبق العراقي و السوري و اكيييييد المصري– اما موالاة او معارضة او حراك شعبي او شباب مش عارف شو كلو بلش بعد الربيع الزفت – الربيع العربي-  الي انا ضده جملة و تفصيلا.

ما علينا .. بما انو الربيع بلش و بلش في تونس و مصر وامتد لليبيا واليمن و علق في سوريا – الله يفكها عليهم-, قراروا شباب الاردن اللطفيين الي مش فاهمين الا انو انا اعتصم اذا انا موجود – الا من رحم ربي-!   يشبّهونا في الدول العربية الشقيقة بدون الانتباه او حتى التفكيير بعواقب هذا الربيع على البلد الي همه اصلا بقولوا احنا بدنا مصلحة البلد.
بدي مصلحة البلد!! كانت هادي الجملة دائما اتضحكني لما اقرئها ع توتير او فيسبوك- الله يخلف عليهم لانهم كانو السبب بالربيع العربي-

كيف بدك يا شب يا لطيف مصلحة البلد و انت مقضيها اعتصامات و سبسبة ع الحكومة و سبسبة ع كل واحد في هال البلد, كيف بدك مصلحة البلد و انت كل جمعة بتشل امل منطقة وسط البلد في عمان !! عمرك فكرت في اكم واحد بطعمي عيالو بس من رزقة يوم الجمعة عند الجامع الحسيني, عمرك فكرت قديش كلفت الدولة عشان تنزل الدرك و الامن لتحمي اعتصامك الي مش معروف شو الاجندة تاعتو, عمرك فكرت اكم صاحب مصلحة انت اذيت بس لمجرد انك دعيت لاعتصام يوم الجمعة؟؟ !! اكيد لا.

الصورة تتكلم!


شو جنّت مصر سوريا او حتى اي بلد مشيت ورا الربيع العربي ؟؟

1-      الموسم السياحي الاسوء.
2-      انهيار تام لمدة قاربت العام في بعض الدول للبورصة والتعاملات المالية العالمية.
3-      تفجير خط الغاز المصري الاردني اكتر من 5 مرات خلال سنة.
4-      انعدام تام للامن والامان في هذه الدول و خاصة مصر – على لسان اردني عائد من مصر-.
5-      وفوق كل هاد قعدوا فترة و منهم لا يزال تحت حكم الجيش.
6-      والاهم من كل الي سبق... ضحايا ما الهم ذنب.

بدكم نوصل في الاردن لهادي المواصيل و النتائج, اذا جوابك اه, انا لا , انا بدي بلدي يضل بامن و امان واستقرار, و من هادي النقطة بقدر اقولك تنتهي حريتك عندما تبدأ حرية الاخرين.


طيب.. واحد منكم قالي و الاسعار النار و الرواتب الزبالة مش قادرين نتنفس يا زلمة, يعني الرفعة الاخيرة للبنزين والله ما كانت متوقعة و ما الها داعي, ايام الذهبي كان البرميل ب 147 دولار و كنا ندفع 16 دينار حق تنكة البنزين و اليوم سعر البرميل 113 دولار ندفع حق التنكة 15 دينار !!

انا معكم و انا من اول الاشخاص الي عمل تغريده لجلالة الملكة رانيا العبدلله في يوم عيد ميلادها لما رفعوا الاسعار و قلتلها "هذه هدية الحكومة النا في يوم عيدك". انا مش ضد انك تقول لا او انا ضد هذا الشيء, انا ضد الطريقة الي بتعبر فيها عن رفضك, حتى برفضنا لاي اشي لازم نورجي العالم رقي وتحضر الشعب الاردني, مش الهمجية والتخلف والتخريب و التكسير.
الحمدلله الله ما بنسى عبادو, بعتلنا ابو حسين عشان يوقف بظهرنا ويكون معنا ضد هذه النوعية من الاشخاص, نصر شعبو على الكل.
اخيرا. كتيير مهم انو ما نوقع في نفس المطب الي وقعوا في دول الربيع العربي و نخاف ع بعض وع  بلدنا و انشالله غدا يوما اخر.











Saturday, March 31, 2012

الزائر الابيض الدليل


الزائر الابيض هو الدليل من سلسلة
مقالات سرقوا عمان …

الاسبوع الماضي زانا التلج, لعبنا,انبسطنا, اتصورنا وحطينا الصور ع الفيسبوك و توتير و ما ضل مكان الا وشيرنا الصور فيي.. مشالله علينا,فرحنين قوي,ما علينا و انشالله اتكونوا انبسطوا و الرجل التلجي تاعكم مع ارجيلتو اخد اعلى لايكات.

امانة عمان مشكورة الها 3 سنين عم تنفذ مشروع الصرف الصحي في حارتنا, المشروع الذي ﻻ ينتهي -عمر الحارة 32 سنة ولسة ما فيها صرف صحي- اجو النشامى (مش عارف ليش هيك بسموهم مع انو كل العمال مصاروة) و
حفروا و مددوا و بعد 4 اشهر من حفر شارع بيتنا زفتوا. صراحة انزلنا ع الشارع و عملنا حفلة لما زفتوا, يا ريتهم ما زفتوا ..

دعوة غريبة صح؟؟!!
بالعكس دعوة صحيحة و في مكانها تماما! قولولي ليش,قولتولي ليش؟

لما يجوا نشامى الامانة و يزفتوا الشارع وبس تمشي السيارت عليه يهبط, اكيد راح نتمنى انو ما اتزفت لما يرجعو يزفتوا بعد التهبيطة الاولى وتتلج الدنيا (الزائر الابيض) يقوم التزفيتة التانية تتكسر مش تهبط اكيد راح نتمنى انو بعمرهم ما زفتوا, ﻻنو لو ما زفتوا احنا راح نكون عارفين انو في حفر هون او خنادق بالمعنى الاصح ونخفف السرعة وبالتالي السيارة راح تضل سليمة-لمدة اطول اذا صح التعبير- اما لما يزفتوا ونطمن انو اتزفتت الشوارع ونكون سايقين في امان الله و الشارع عتمة,طبعا ﻻنو شركة الكهربا بتغلي التعرفة بدون صيانة للمبات المحروقة او تمديد اعمدة انارة في الشوارع الي اصلا ما فيه اعمدة, وﻻ طج اكلت جورة نص متر و بطل الغيار يركب. دان الماتور سلامتك.

وبعد كل هاد ببطلوا يزفتوا بصيروا يحطوا حصمة بدل الزفتة عشان يسكروا الحفر, طبعا الميزانية لتزفيت الشارع خلصت..


السؤال القوي.. وين راحت الميزانية ؟

اكيد ما تتوقعوا مني جواب على السؤال اﻻ اذا مكافحة الفساد قررت تنشر اعترافات الشباب الطيبة.

سرقوا عمان و سرقوا شوارعها .. 

وين المشكلة ؟ في السيارات في الشتا و التلج في العمال وﻻ المسؤليين ؟

  • السيارات ؟؟ كل العالم عندها سيارات و شوارعها بتتمنى تنام عليهم مش تسوق عليهم ..
  • الشتا و التلج ؟؟ اوروبا امريكا وﻻ يا حبايب على استراليا فيضانات فيهم و شوارعهم برضة زابطة حتى لبنان -اذا بدكم بلد عربي-
  • العمال؟؟ الله يعينهم عبدا مؤمور شيل هاد و حط هاد .
  • المسؤليين ؟؟ الله يعينهم كمان بدهم يعبوا جيوبهم, بدهم يحطوا ولدهم في احسن مدارس يسافروا في الصيف و يركبوا احسن سيارات ..
سؤالي للمسؤلين هون, وين بدكم اتسوقوا هادي السيارات ؟؟ على الشوارع الي الحفر فيها اكتر من الزفتة وﻻ على طريق المطار الي بدو يصير بمصاري ؟؟
لو المسؤل فكر للحظة انو هو كمان بستخدم الشارع و اوﻻدو ومرتوو و العيلة الكريمة كلها يمكن كان عمل حساب راحتهم على هادي الشوارع, بس هو كل تفكيروا مصبوب على تجميع اكبر مبلغ ممكن قبل ما يطير الكرسي من تحتو..

لو فكرنا هون الحق على ميين؟ الحق على التربية تبعتو؟ وﻻ البيئة الي عاش فيها ؟ المدرسة الي ما نمت روح المواطنة الصالحة و الاخلاق الحميدة في نفسه ؟ ..

طبعا في اكتر من سبب للنتيجة الي احنا وصيلنالها بس انا برأي يمكن للعطار ان يصلح ما افسده الدهر من خلال التركيز على النشئ القادم, و يا معلمينا الكرام اخدتوا النقابة اعطونا جيل مبدع محب لبلده معطاء و كامل من جميع النواحي ..

هون صور الخندق الي كنت راح اكلوا وقت التلجة.. 







http://facebooklogin.ws/2009/12/facebook-login/