Saturday, October 1, 2011

إن خليت بليت



إن خليت بليت... مصطلح اردني شائع  يستخدم عندما يحدث معك امر مغاير لجميع توقعتك و عادة ما تكون  توقعاتك سلبية و يفاجئك الامر بالايجابية البحتة .

امبارح كنت طالع مع اهلي عشارع الوكلات في الصويفية - عمان و اكيد معنا المرافق الدائم اختي لانا و اولادها ريانة و يوسف ( مستر نكد) زي ما كل العيلة عنا بتسميه, يوسف عمرو اليوم 4 سنوات (اليوم عيدو 30\9) تلات سنوات منها قضاها بعيط (يبكي) اذا بدو يشرب بعيط بدو يشتري بعيط بدو يحدر افلام كرتون ببكي الخ الخ الخ.. 
المهم امبارح مستر نكد ضل معي لانو امو دخلت ع محل تشتري اكم غرض, امشيت انا وهو لاخر شارع الوكلات واذ في واحد عم بيبع بوظة , و مستر نكد مستحيل يشوف البوظة و ما يشتري, بس الجو كان برد فقولتلو انو ما راح اشتريلك ... ويا ريتني اشتريت حبة هالبوظة.

بلش يبكي تركتو في شارع الوكلات و مشيت شوي بعيد عنو حتى يلحقني, اجو شباب حتى يسكتوا فهو خاف منهم و ركض عندي ارجعتلو حتى اخدو ما قبل رديت تركتو و ردوا اجو كمان مرة شباب و بنات جداد لحتى يسكتوا ما زبط معهم, ارجعت حملتو و هو عم يبكي ورحت اشوف امو وين .. كان كتير احسن لو خليت امو تيجي لعنا.

انا وماشي لعند ﻻنا حتى تضربو تفشلي خلقي فيّ بيجيني اربع خمس شباب عمرهم بحدود 13 سنة و بقولي واحد منهم "بعد اذنك ابو الشباب هاد الولد بقربلك ؟" اتفرجت في وكان نفسي اضربو ﻻنو انا اصلا مش طايق حالي من يوسف بس مسكت حالي و قلتلو "بيقولوا اني خالو واكيد ما راح اخطف ولد متلو ولو بدي اخطف بخطف ولد ما بعرف كيف يبكي" قالي "والله بتخطوفوهم لو شو ما كانوا..." بعد هادي الجملة صار لازمو قتلة بس الي فرحني فيّ انو شب عمرو مش اكتر من 13 سنة نخونجي و نشمي وما خاف انو لو انا عنجد خاطف وﻻد كان ممكن اكون مسلح و ما عندي اي مشكلة بضربو.. قلتلو "الله محيهم النشامى وفيكم الخير والله " رد علي "بكرة بس يكبر (قصدو عن مستر نكد) راح يرديلي هاد الخير في حد بقربلي.." في هادي اللحظة وصلت ﻻنا و سالوها اذا انا خاطف يوسف او ﻻ , بس اتاكدوا من الموضوع اعتزروا و راحوا.

 من كثر ما بنسمع عن جرائم خطف و قتل قلنا ما عاد عنا امان بس  طلعت لسى الدنيا بخير و عنجد ان خليت بليت.
       من الدوشة الي انا كنت فيها من مستر نكد ما صار مجال انو اتشكر هدول الشباب على نخوتهم و خوفهم على ولد ما بعنيلهم اشي بس انا هلا بتمنى تقروا هذه المقال و تعرفوا قديش احنا كلنا فخروين فيكم و مبسوطين منكم يا نشامى يا رجال بعمر الورد  و بلدنا راح يتعمر اكتر و اكتر فيكم وكل الي متلكم, انتو فرسان التغير, فرسان الاردن.

 اخيرا بتمنى كل ولد ضايع يرجع لاهلة سالم غانم و الله ما يحرم ولا اب او ام من ولادهم ..


محمد حرزالله


http://facebooklogin.ws/2009/12/facebook-login/